დღეს ზესტაფონმა ქართული  ხალხური მუსიკის ფესტივალ "სულიკო-2009"-ს უმასპინძლა. ზესტაფონის მუნიციპალიტეტის გამგეობის ორგანიზებითა და ს/ს "ჯორჯიან-მარგანეზი"-სა და ს/ს "საქკაბელი"-ს სპონსორობით ჩატარებულ ფესტივალში მონაწილეობა იმერეთის მხარის 12-ვე მუნიციპალიტეტის 30-მდე მუსიკალურმა კოლექტივმა მიიღო. ქართული ხალხური მუსიკის პოპულარიზაციის მიზნით შექმნილი ფესტივალი ათვლას გასული საუკუნის 80-ანი  წლებიდან იწყებს და ტრადიციულად სოფელ ცხრაწყაროში, აკაკი წერეთლის ცნობილი ლექსის მიხედვით შექმნილ სიმღერის მელოდიის ავტორის, ვარინკა წერეთელი-მაჭავარიანის მშობლიურ სოფელში სპეციალურად ფესტივლისათვის მოწყობილ ღია თეატრონზე ტარდება და მას "ვარინკობის" დღესასწაულსაც ეძახდნენ.

 "სულიკო-2009"-ს ჟიურს ხელმძღვანელობდა კომპოზიტორი ვაჟა აზარაშვილი, შემადგენლობაში იყვნენ ზაზა კორინთელი(ზუმბა), თამარ ჩხეიძე, ნინო ჩხეიძე, მერაბ დონაძე, ელდარ შალამბერიძე, კომპოზიტორები: მარიკა კვალიაშვილი, ნუნუ დუღაძე, ნუნუ გაბუნია, რეჟისორი გოჩა კაპანაძე, გომარ სიხარულიძე. ფესტივალის ორგანიზატორთა მიერ გამარჯვებული მუსიკალური კოლექტივებისათვის დაწესებული იყო  პრიზები- ფესტივალის სიმბოლოები: ქანდაკებები ბულბულისა და ჩანგის გამოსახულებით და ფულადი ჯილდოები.

ჟიურის ერთობლივი გადაწყვეტილებით გრან-პრი ფოლკლორულ სიმღერაში გადაეცა ხარაგაულის კულტურისა და შემოქმედებით ცენტრთან არსებულ კიცხის ფოლკლორულ ჯგუფ "ადილა"-ს, ხოლო გრან-პრი ლირიულ სიმღერაში თერჯოლის ვაჟთა ვოკალურმა ჯგუფმა აიღო.

ფესტივალი "სულიკო" ცხრაწყაროში 1981-1988 წლებში ტარდებოდა და მასში მონაწილეობას არამარტო ქართული კოლექტივები ღებულობდნენ. "ვარინკობის" დღესასწაულმა საერთაშორისო მასშტაბებს მიაღწია. თითქმის 20 წლის მანძილზე გაწყვეტილი ტრადიცია ზესტაფონის ადგილობრივი თვითმმართველობის ძალისხმევით 2007 წელს ისევ აღდგა.