2009-2010 სასწავლო წლიდან აკაკი წერეთლის სახელმწიფო უნივერსიტეტს ახალი სასწავლო კორპუსი შეემატა, რომელიც 16 სექტემბერს განათლებისა და მეცნიერების მინისტრმა ნიკა გვარამიამ გახსნა. პრეზენტაციას ქუთაისის მაჟორიტარი დეპუტატი  აკაკი ბობოხიძე და სახელმწიფო რწმუნებული-გუბერნატორი მიხეილ ჩოგოვაძე დაესწრო.

ბატონმა ნიკა გვარამიამ  და უნივერსიტეტის რექტორმა პროფ. გიორგი ონიანმა აღნიშნეს, რომ ახალი სასწავლო კორპუსი უმნიშვნელოვანესი შენაძენია უნივერსიტეტისა და მთლიანად ქალაქისთვის. ეს პროექტი  ხელისუფლების დიდი მხარდაჭერით განხორციელდა.

ახალმა სასწავლო კორპუსმა ყოფილი რუსული სამხედრო ბაზის ტერიტორია დაიკავა, მისი სარეაბილიტაციო სამუშაოები დაფინანსდა განათლებისა და მეცნიერების სამინისტროს მიერ. კორპუსში განთავსდა მედიცინის, ქიმიისა და ბიოლოგიის მიმართულებები. კორპუსი 1000 კვ. მ. მოიცავს და 300-ზე მეტ სტუდენტზეა  გათვლილი, მთლიანად ახალი კორპუსის ინფრასტრუქტურა  3000 კვ. მ. შეადგენს.

თანამედროვე საკვლევი ტექნიკით აღჭურვილი აუდიტორიებისა და ლაბორატორიების პარალელურად, ახალ სასწავლო კორპუსშია ზოომუზეუმი, რომელიც უნივერსიტეტში 1938 წლიდან ფუნქციონირებს და მასში უნიკალური ექსპონატებია დაცული.